يازين لو اقدر ببعدك وفرقاك
ماقدر على فرقا أحبال النشايب
والله لسلى ماأشهد الحب واسلاك
وابعد عن اللي يودع الراس شايب
لاكن أنا اللي معجب فيك وابغاك
وأجيك لو بيني وبينك مصايب
أن كنت تنساني فأنا مقدر أنساك
مادام فوق الراس تذري الهبايب
وأن مت تمنحني بعطفك وبرضاك
وسلام لامريت عوج النصايب
اليا مت بسبابك فأنا جعلي أفداك
الموت حق وصار منك السبايب
دايم وقلبي ياهوى البال يرعاك
وأنته معي موجود لو كنت غايب
حتى الكلام الياسمعته من شفاك
أرتاح لو الجرح ماهو بطايب
رسم على عيني خيالك وذكراك
مانساك لو انسى الأهل والقرايب
ولااشوف في هالكون مثلك وشرواك
لا والذي يعطي جزيل الوهايب
الخالق اللي بأحسن الخلق سواك
سبحان خلاق(ن) بخلقه عجايب
علام مابين الكواكب والأفلاك
وعلام ماتخفي القلوب اللبايب
يازين تهواني وانا مثلك اهواك
ومتحير(ن) مابين مخطي وصايب
أترك هوى نفسي واسايرك برضاك
وأهل دمع العين مثل السحايب
وقلبي يبا فج صدره وينصاك
أخاف لايخلي ضلوعي حطايب
أمناية أجلس معك واسعد بلاماك
وتغمر بفرحتنا القلوب الحبايب
وأموت واحيا من شمالك ليمناك
وبين الخدود وبين شقر الذوايب 0
