العيد فرحه والحزن لابسه ثوب

السلام عليكم ورحمة الله وبركاته
أهنئكم بحلول عيد الأضحى المبارك
أعاده الله علينا وعليكم ،وعلى الأمة العربية والإسلامية بالخير والبركات
وكل عام وأنتم بخير





العيد فرحه والحزن لابسه ثوب
والهم كاسيني هو شماغ وعقال


اضحك وأثاريه الفرح داخلي يْذوب
أحس به دمع ٍ سرا بخاطري سال


ياكيف بتهنّى وشوقي بكل صوب
يرمي سهامه لي وطعناته جْزال


حتى الضيا ونوري من الخد مسلوب
سرقه بعدك والجفا وقلّة وْصال


أمشي وأهوجس بك وضاقت بي دْروب
أشوف زولك وأتبعه وأرحم الحال


وأهيجن بْشعري وأغنّيه مسحوب
ونّات صدري مدويه هزّت جْبال


لعلها تاصل وتسمعها وأتّوب
ويحن لي قلبك ترى ذا الهجر طال


أختم قصيدة عيد بيتين مكتوب
فيها أماني شاعرك يالغلا قال


أبيك ترفق للوفا تلبسه ثوب
وأنا أبلبس ثوب صبري والآمال


يمكن عسى تذكر خليل ٍ ومحبوب
ترجع ويكسيني الهنا شماغ وعقال