ليش .. وبدون ليش
ليش: كل ماوصّلني الريموت لقنواتنا المحلية ، أشعر إني فاتح على القناة اللبنانية الأولى.
بدون ليش : القنوات صارت أكثر عن المشاهدين ، واللي يغربل هالكم الهائل مارح يبقى له غير قنوات الأفلام وسبيس تون؟!
ليش : شبابنا حسّهم موبايلات وكنادير غلاظ ، لا وتطورت السالفة لتقشير البشرة والبدكير والمناكير ، وباقي عليهم يحنوّن ريولهم على العيد …
بدون ليش : عيال اليابانيين يهتمون بكل شي مهوب تافه من الواردات اعلاه
ليش : كل ماطلبت من الدكان شغلة معينة ، مايقول ماعندنا ، لكنه اييب شي من راسه ، يعني مثلآً اطلب حليب اييب لي عصير ، واطلب سندويشه شورما لحم ، اييب لي دياي، ويوم تتصل به تواجعه بعد وصول الطلبات ، يقول لك ماعندنا ،طيب قول مافيه وفكنا من هالصدعة الراس.
بدون ليش : يرفعون الأسعار يوم عن يوم اللهم ياكافي ، الله يجيرنا من الزمن اللي تصير به الامية درهم مساويه للخمس ربيات.
ليش : أمثالنا تخوّفك من الحياة ، اللي يطالع فوق يتعب ، مد ريولك على قد لحافك ، كثرة الدق تفج اللحام ، ويخربونها قوم الفصيح بما كل مايتمنى المرء يدركه .. والقناعة كنز لا يفنى وهالسوالف..
بدون ليش : الامثلة الغربية ،فرند ان ديد از ان نيد ، لايك فاذر لايك اسن ، وعندما يركلك الناس من البيهايند تاكد أنك في الفرست شيرز ( يسمع بشي اسمه انجليزي )
ليش : يوم تحضر عرس ، تحس إنك حاضر عزا ، ناقص تسلم على المعرس تقول له “عظم الله اجرك” ، هدوووووء ، لا حس ولا صوت ، طيب ياجماعة ماخليتوا شي الا حرمتوه ، وإخوانا المطاوعة يجلسون لك في العرس كأنهم هيئة الامر بالمعروف اللي في السعودية ، عسى ماضحكت ضحكة من الخاطر الا عطوك هذيك النظرة التكفيرية اللي تخليك تبلع ريقك بصوت يوصل للصالة اللي بعد الصالة اللي عدالكم ..
بدون ليش : كل ماحضرت عرس أي جالية عربية او حتى اجنبية ، اجد عكس اللي فوق بالضبط .
ليش :شركات الإتصالات عندنا ، لاعروض لا جوائز لا حياة لمن تنادي…
بدون ليش : الإتصالات في مصر لم تترك فلماً تافهاً أو أغنية هابطة إلاّ كانت راعيةً له …ناهيك عن العروض اللي تقهر اللي ماينقهر
ليش : أغانينا صارت تساعد على الرقص والهز ياوز ، كلام معلّب وغنّه ومش حالك ، والمراهقين كل يوم واحد منهم مسوي لعمره فيديو كليب ، وين أيام “وهم” و”اجر الصوت” و”على البال” , وغيرها من الاغاني الطربية الجميلة اللي نفتقدها ..
بدون ليش : محمد عبدو ، شكراً لأنهم توقفوا عن بث أماكنك
ليش : الشباب (وانا منهم ) يلبسون نظارات شمسية في عز الليل ..أو وهم داخلين المولات …ياخي لو حاس انك داش مكان غلط، انثبر في بيتكم وعن تربك خلق الله بنظاراتك اللي تحسسنا انك سيّد مكاوي داخل يتشرى له عود .
بدون ليش : الأجانب يمشون في المولات ( أقصد الأوروبيين وغيرهم ) وكأنهم يتمشون في صالة بيتهم ، لاحيا ولا مستحى ، وأحس اكثرهم ناسي ملابسه الداخلية في البيت ، وتلقى واحدهم قابض زوجته (يحسن الظن ) ويحضنها في اللفت ولا في السلم الكهربائي ، يحسسنا انها بشكارتهم وخايف عليها تشرد ، والمشكلة ماحد يروم يكلمهم (مايعرف انجليزي) ، انا مرّة شفت واحد أجنبي أبو عيون جريئة عند الاشارة ، وكان الله يذكره بالخير لابس شراب ( دلاغ) وسلم لي على شاهد ماشافش حاجة.
ليش : البنت تتضايق يوم حد يتحرش ابها ، رغم انها طالعة من بيتهم ومضيّقه على عمرها في كل شي ، في عباتها وفي بنطلونها وفي شيلتها ، وتمشي تبرق تقول صالة عرس متحركة، ورغم هذا يويل من يتحرش فيها ، طيّب الحشيمة ماحد ايي صوبها ، لكنها مقيوله : اللي اختشوا ماتوا ..
بدون ليش : العنوسة بإزدياد ، والبنات طايحات في كبود هلهن ، والأسباب مجهولة ، وأنا خايف اعنّس ..حد بيخطبني!
ليش : قبيل الأذان بشوي ، القنوات الغنائية تحط اناشيد ، بعدين يأذن ، بعدين شوية أناشيد ، وما هي ثواني ويحطون نانسي عجرم؟!..طيب هالصحوة الروتينية المصطنعة ..مامغزاها؟
بدون ليش : بعض القنوات واللي هي اولى بالأذان وببركة الأذان من قنوات الهشّك بشك، ماتحط الأذان ، لكنها تهنئ إخوانا المسيحيين بالعيد المجيد!
ليش : عند ذهابك لعزا أحدهم ، وبينما أنت تحمل النعش مع الجميع، تجد فلان يتحدث في العقارات ، وفلان يراود علان ليبيع له سيارته، وثالث يتحدث عن صديقته الأجنبية اللي تعرّف عليها من يومين ..ألهذه الدرجة لم يعد للموت هيبة ؟!
بدون ليش : القبور أوسع من المخابي ، إلاّ أن الثانية تتسع لأصحابها وغير أصحابها؟!
ليش : أنا كتبت كل اللي فوق؟
بدون ليش: استروا على ما وايهتوا
![-[ مشرفة منتدى الجمال والأناقة ]-](https://i.servimg.com/u/f82/11/42/36/74/16443610.gif "-[ مشرفة منتدى الجمال والأناقة ]-")
![-[ آلمديرة آلعآمة ]-](https://i.servimg.com/u/f82/11/42/36/74/35547510.gif "-[ آلمديرة آلعآمة ]-")
